6 Ágúst 2017 13:56

Nokkur erill var hjá lögreglunni síðustu nótt en mikill fjöldi þjóðhátíðargesta var í Herjólfsdal. Fjórir gista fangageymslu vegna ölvunar og ofbeldisbrota. Í einu ofbeldisbrotinu var aðili sleginn þannig að tennur brotnuðu. Allir sem gista fangageymslu verða yfirheyrðir í dag eða leystir út með sekt vegna brota á áfengislögum.

Fíkniefnamálum fjölgaði frá því gær og eru þau komin á fjórða tug. Í einu málinu var gerð húsleit í húsi í bænum og fannst þar um 20 gr. af hvítu efni. Talið er að hér sé um sölumál að ræða. Mest hefur verið lagt hald á hvít efni, amfetamín og kókaín.

Mikil umferðarteppa var í miðbæ Vestmannaeyja í gærdag þar sem mikill mannfjöldi hafði safnast saman við veitingastaði og götum verið lokað. Lögregla leysti farsællega úr málum en umferð hefur aukist gríðarlega í Vestmannaeyjum eins og gefur að skilja.

Í dag mun Herjólfur fara fimm ferðir til Landeyjarhafnar og er fullbókað í þær ferðir og munu því bætast við tvö til þrjú þúsund manns við þann mikla fjölda sem fyrir er. Áætlað er að á brekkusöngnum á miðnætti verði um fimmtán til sextánþúsund manns.