Alls voru 269 verkefni bókuð þessa viku. Nokkuð annasamt var hjá lögreglunni vegna sjúkraflutninga en 25 slíkir voru skráðir. Flestir þessara sjúkraflutninga enduðu á sjúkrahúsi í Reykjavík og því nokkur tími sem fór í hvern sjúkraflutning.

Umferðin

Þrettán umferðaóhöpp voru tilkynnt til lögreglu í vikunni og urðu slys á fólki í nokkrum þeirra. Á föstudag var hópbifreið ekið aftan á sendibíl á Ölfusárbrú á Selfossi. Áreksturinn var nokkuð harður og hlaut ökumaður sendibílsins minniháttar áverka. Umferðartafir urðu um tíma á Ölfusárbrú vegna árekstursins. Þá valt hópbifreið á Kjalvegi, skammt sunnan Grjótár, á miðvikudagskvöld. Ökumaðurinn var einn í bifreiðinni og slasaðist hann talsvert og var fluttur með þyrlu Landhelgisgæslunnar á sjúkrahús í Reykjavík. Bæði þessi slys eru til rannsóknar hjá lögreglu og beinist rannsóknin meðal annars að ástandi hópbifreiðanna.

Á föstudag kom þriðja hópbifreiðin við sögu í umferðaróhappi þegar tveir erlendir ferðamenn slösuðust og voru fluttir á sjúkrahús í Reykjavík. Slysið varð með þeim hætti að ökumaðurinn veitti ekki athygli hraðahindrun sem er við Laugarás og ók of geyst yfir hana með þeim afleiðingum að ferðamennirnir tveir sem voru farþegar í bifreiðinni köstuðust upp úr sætum sínum og skullu í þak hópbifreiðarinnar. Ekki er talið að meiðsl ferðamannanna séu alvarleg. Ætla má að bílbelti hefðu getað komið í veg fyrir þetta slys hefðu þau verið notuð líkt og lög gera ráð fyrir.

Alls voru 24 ökumenn kærðir fyrir of hraðan akstur í vikunni og einn fyrir ölvun við akstur. Tveir ökumenn voru staðnir að því að aka bifreið eftir að hafa verið sviptir ökuréttindum. Þessir tveir mega búast við háum sektum fyrir brot sín, jafnvel fangelsi. Einn var kærður fyrir að leggja bifreið sinni á gangstétt á Austurvegi á Selfossi og fimm fyrir að vanrækja að færa ökutæki sín til skoðunar.

Um helgina var hald lagt á fíkniefni í húsi á Árborgarsvæðinu. Þá komu upp tvö mál í fangelsinu að Litla-Hrauni þar sem fangaverðir fundu fíkniefni í fórum fanga. Mál þessi eru í rannsókn.

Sjö sinnum aðstoðaði lögregla fólk sem læst hafði lykla inni í bifreiðum sínum og í tveim tilfellum voru íbúar aðstoðaðir við að komast inn í læst hús eftir að hafa læst sig úti.