Almennar upplýsingar um sektir

Ný reglugerð um sektir tók gildi 1. janúar 1998 og með samtengdu tölvukerfi lögreglunnar var þá tekið í notkun nýtt samræmt sektarkerfi, sem tryggði að í fyrsta skipti var hægt að tryggja að sömu viðurlög giltu fyrir sömu brot, hvar sem var á landinu.

Á árinu 1998 voru send út samtals 31.135 sektarboð vegna umferðarlagabrota. Sé miðað við að Íslendingar séu samtals 275.000, þá þýðir það að níundi hver Íslendingur hafi fengið sent sektarboð vegna umferðarlagabrota! Að sjálfsögðu er það ekki þannig, því þeir sem eru til fyrirmyndar í umferðinni eru fleiri en hinir. Margir þeirra sem fengu send sektarboð teljast til "síbrotamanna" í umferðinni og fengu því mörg sektarboð meðan aðrir fengu engin.

Einn stærsti kosturinn við þetta nýja sektarkerfi er sá, að núna er tekið á "síbrotamönnum" í umferðinni. Í viðauka við reglugerð um sektir, nr. 280/1998, eru tilgreindar sektir við hinum mismunandi umferðarlagabrotum og að auki eru tilgreindir umferðarpunktar, sem eru viðbótarviðurlög við sumum þeirra. Þeir sem eru brotlegir í umferðinni safna umferðarpunktum og þegar tilgreindu hámarki er náð, eru þeir sviptir ökuréttindum í 3 mánuði.

Frekari upplýsingar um sektir, umferðarpunkta og fjölda þeirra sem fengu sektir og umferðarpunkta er að finna á lögregluvefnum.

Ennfremur er að hægt að kynna sér reglugerðir þessu tengdu undir liðnum "lög og reglugerðir" hér til hliðar.