20 Apríl 2022 14:39
Talsvert hefur borið á hraðakstri á höfuðborgarsvæðinu að undanförnu og sektarbókin hefur því verið óvenju mikið á lofti. Síðdegis í gær voru t.d. þrjátíu ökumenn staðnir að hraðakstri á Reykjanesbraut í Hafnarfirði, gegnt Ásbraut. Þeir mega flestir búast við sekt upp á 80-100 þúsund kr. fyrir brot sín.
Hætt er við að þetta komi illa við pyngjuna hjá mörgum. Ökumenn eru því áfram hvattir til að vera réttu megin við lögin, ekki bara til að forðast óþarfa útgjöld, heldur til að stuðla að umferðaröryggi allra.