Upplýsingar fyrir þá sem sæta bakgrunnsathugun lögreglu
Ríkislögreglustjóri: ber ábyrgð á bakgrunnsathugun vegna flugverndar.
Lögreglan á Suðurnesjum: annast framkvæmd bakgrunnsathuguna vegna flugverndar.
Isavia: ber ábyrgð á aðgangsheimildum flugvalla og hefur milligöngu vegna beiðni um bakgrunnsathuganir vegna flugverndar. Sjá nánar um ferli umsóknar hér.
Bakgrunnsathuganir lögreglu vegna flugverndar eru framkvæmdar á grundvelli 158. og 159. gr. laga um loftferðir nr. 80/2022 og sbr. reglugerð um flugvernd nr. 750/2016.
Upplýsingaöflun: Með bakgrunnsathugun er átt við skoðun á bakgrunni einstaklings, a.m.k. 5 ár aftur í tímann frá dagsetningu umsóknar, ef hann hyggst beita flugverndarráðstöfunum, mun bera ábyrgð á framkvæmd flugverndarráðstafana, þarf starfs síns vegna aðganga að haftasvæði flugverndar, þarf starfs síns vegna aðgang að trúnaðarflokkuðum upplýsingum á sviði flugverndar, mikilvægum upplýsingum, upplýsingatæknikerfum og gögnum í þágu flugverndar, hyggst sækja eða veita flugverndarþjálfun, hyggst sinna eftirliti á sviði flugverndar, svo unnt sé að leggja mat á öryggishæfni umsækjanda, áreiðanleika og hvort öryggi flugsamgangna og flugstarfsemi kunni að stafa hætta af umsækjanda.
Í bakgrunnsathugun felst skoðun á upplýsingum í skrám lögreglu, sakaskrá og skrám dómstóla, upplýsingakerfi Interpol, Schengen-upplýsingakerfinu, Þjóðskrá, hjá tollyfirvöldum, héraðsdómstólum og eftir atvikum í öðrum opinberum skrám eða hjá erlendum yfirvöldum.
Vöktun í LÖKE: Lögregla hefur eftirlit með skráningum bakgrunnsathugaðra einstaklinga í málaskrá lögreglu (LÖKE), meðan þeir gegna þeim störfum sem krefjast bakgrunnsathugana vegna flugverndar.
Niðurstaða bakgrunnsathugana er gefin í formi umsagnar. Standist viðkomandi bakgrunnsathugun er honum veitt jákvæð umsögn, standist hann ekki bakgrunnsathugun er honum veitt neikvæð umsögn.
Framkvæmd bakgrunnsathugunar er háð heimild eða staðfestingu þess aðila sem sætir bakgrunnsathugunar, sbr.:
-
- 1. mgr.159. gr. laga um loftferðir nr. 80/2022 og
- 25. gr. reglugerðar um flugvernd nr. 750/2016.
Vanda skal útfyllingu eyðublaðsins. Skortur á upplýsingum sem taka þarf fram eða misræmi í upplýsingum, getur tafið afgreiðslu umsóknar, haft áhrif á trúverðugleika viðkomandi og niðurstöðu bakgrunnsathugunar, þ.m.t. ákvörðun um umsögn.
Afgreiðsla umsóknar getur tekið allt að þremur mánuðum. Upplýsingar um beiðnir í vinnslu eru ekki veittar á afgreiðslutíma.
Komi fram neikvæðar upplýsingar við bakgrunnsathugun er viðkomandi send tilkynning um fyrirhugaða neikvæða umsögn og honum gefinn kostur á andmælum samkvæmt ákvæðum stjórnsýslulaga nr. 37/1993. Þá kann viðkomandi að vera kallaður í öryggisviðtal. Sé endanleg niðurstaða að veita viðkomandi neikvæða umsögn er honum sent erindi þar um ásamt upplýsingum um kæruheimild til ráðherra. Aðgangskortastjórnanda er einnig send tilkynning um neikvæða umsögn en án ástæðu eða útskýringa.
Um upplýsingarétt þess sem sætir bakgrunnsskoðun um aðgang að upplýsingum um hann sjálfan fer samkvæmt 17. gr. laga um persónuvernd og meðferð persónuupplýsinga nr. 90/2018 og ákvæða stjórnsýslulaga nr. 37/1993.
Ríkislögreglustjóri ber ábyrgð á vinnslu þeirra upplýsinga sem gefnar eru upp á eyðublaði þessu, skulu upplýsingarnar því eingöngu notaðar af lögreglu í þeim tilgangi sem tilgreindur er, sbr. 2. tölulið 1. mgr. 8. gr. laga um persónuvernd og vinnslu persónuupplýsinga nr. 90/2018.
Nánari upplýsingar má finna í persónuverndarstefnu lögreglu.
