Vikan 20. til 27. mars 2017.

27 Mars 2017 11:44
Síðast uppfært: 27 Mars 2017 klukkan 11:44

Eins og komið hefur fram í fjölmiðlum féll snjóflóð í botni Súgandafjarðar að kveldi 21. mars sl. Fjórir fjallaskíðamenn voru þar á ferð. Þrír þeirra urðu fyrir flóðinu en komust sjálfir út úr því og hlutu ekki alvarlega áverka, utan einn var fluttur á sjúkrahús og mun hafa meiðst á fæti. Snjóflóðahætta er ekki í byggð á Vestfjörðum en hins vegar er hún talin töluverð til fjalla, utan byggðar. Útivistarfólk er hvatt til að gæta varúðar og fylgjast með spám á heimasíðu Veðurstofu Íslands, sjá hlekkinn hér http://www.vedur.is/#syn=snjoflod

Sjö ökumenn voru kærðir í liðinni viku fyrir að aka yfir leyfilegum hámarkshraða. Flestir þessara ökumanna voru í akstri í Strandasýslu, en einnig í Ísafjarðardjúpi, í Bolungarvíkurgöngum og á Ísafirði.

Alls hafði lögreglan afskipti af fjórum ökumönnum sem ekki voru með ökuréttindi í lagi. Einn þessara ökumanna hafði verið sviptur ökuréttindum en ók þrátt fyrir það. Þungar refsingar eru við slíku broti. Hinir voru með útrunnin ökuréttindi. Þessir ökumenn voru stöðvaðir í Strandasýslu í Ísafjarðarbæ og í Vesturbyggð.

Tilkynnt var um eitt vinnuslys í vikunni, en það gerðist á vinnustað einum í Vesturbyggð. Hættulegur vökvi lenti í andliti starfsmanns þar. Maðurinn var fluttur á heilbrigðisstofnunina á Patreksfirði til aðhlynningar. Rannsókn á tildrögum slyssins er í höndum lögreglunnar á Vestfjörðum og Vinnueftirlitsins.

Þá voru tveir ökumenn sektaðir fyrir að vera ekki með öryggisbelti spennt. Báðir voru þessir ökumenn í akstri í Vesturbyggð. Lögreglan á Vestfjörðum vill minna á mikilvægi þess að nota þennan öryggisbúnað og eins að ökumenn noti ekki GSM síma við akstur, ekki nema þá að nota handfrjálsan búnað. Þessum mikilvægu þáttum ætlar lögreglan á Vestfjörðum að gefa sérstakan gaum næstu daga, vikur og mánuði.