Á ofsahraða á stolnum bíl

Lögreglan á Vesturlandi veitti ökumanni á stolnum bíl eftirför í gær frá Akrafjalli að Melahverfi þar sem ökumaðurinn missti stjórn á bifreiðinni.  Hann ók út af og við það valt bifreiðin og endaði á hægri hliðinni.  Skömmu áður en eftirförin hófst hafði verið tilkynnt til lögreglunnar að bifreið hafi verið tekin ófrjálsri hendi við Gamla Kaupfélagið á Akranesi.  Lögreglumenn á Akranesi mættu bifreiðinni á Akrafjallsvegi þar sem henni var ekið á 139 km. hraða í átt að hringtorginu við Hvalfjarðargöng.  Ökumanni bifreiðarinnar var gefið merki um að stöðva aksturinn, sem hann gerði ekki, og var því bifreiðinni veitt eftirför. Þrátt fyrir að lögreglan væri með forgangsljós tendruð þá jók ökumaðurinn ferðina og ók áfram út úr hringtorginu norður Vesturlandsveg á ofsahraða.  Mikil umferð var á Vesturlandsvegi og skapaðist mikil hætta vegna þessa.  Lögreglumenn komu síðan að bifreiðinni við gatnamótin við Melahverfi þar sem hún var utan vegar á hliðinni.  Ökumaður var handtekinn á staðnum grunaður um nytjastuld á bifreiðinni og akstur undir áhrifum ávana- og fíkniefna.  Ökumaðurinn var fluttur með sjúkrabifreið á  slysadeild HVE til skoðunnar.  Hann reyndist ekki slasaður og var vistaður í fangaklefa að skoðun lokinni. [gallery ids="32205"]  

Banaslys á Borgarfjarðarbraut

Erlendur ferðamaður, farþegi í annarri bifreiðinni í árekstri á Borgarfjarðarbraut í gær, sunnudaginn 15. september, hefur verið úrskurðaður látinn. Rannsókn á tildrögum slyssins stendur enn yfir.

Helstu verkefni hjá Lögreglunni á Vesturlandi í sl. viku.

Alls urðu níu umferðaróhöpp í umdæminu sl. viku. Þar af eitt alvarlegt umferðarslys, bílvelta á Skógarströnd þar sem sex ítalskir ferðamenn veltu bílaleigubíl sínum út fyrir veg. Þrennt var flutt með þyrlu á sjúkrahús til Reykjavíkur en hin voru flutt með sjúkrabílum. Einn farþeganna, kona, slasaðist mikið en hún er þó ekki í lífshættu. Aðrir sem í bílnum voru sluppu án mikilla meiðsla. Lausaganga hrossa á vegsvæðum í umdæminu er vaxandi vandamál. All nokkur tilvik hafa komið upp á sl vikum þar sem hross hafa sloppið út á vegi. Flest á Snæfellsnesvegi. Hross eru að sleppa út úr girðingum, sem liggja sums staðar niðri eða eru á kafi í snjó. Þegar harðnar á dalnum í frosti og snjó þarf að huga vel að öllum útigangi og gefa honum vel. Hross sem að ekki fá nóg að éta leita frekar út úr girðingarhólfum. Ábyrgð eigenda er mikil ef eitthvað gerist.

Erlendir ferðamenn voru fastir í snjó hist og her í umdæminu eins og oft áður. Þeim var komið í samband við þjónustuaðila sem drógu þá upp og aðstoðuðu þá við að komast leiðar sinnar. Einn ökumaður var tekinn grunaður um að aka undir áhrifum lyfja.

Lögreglan á Vesturlandi