Brennisteinsmengun í íshelli í Blágnípujökli

Dagana 3. og 17. febrúar s.l. voru gerðar mælingar á brennisteinsvetni í íshelli sem staðsettur er í Blágnípujökli, suðvestur af Hofsjökli. Hellir þessi hefur ekki verið meðal fjölfarinna ferðamannastaða en nú er svo komið að nokkur fjöldi fólks fer þarna með vel búnum fjallabílum í viku hverri. Fréttir hafa sést í fjölmiðlum um alvarlegt atvik sem talið er tengjast menguninni. Utan hellisins var styrkur brennisteinsvetnis (H₂S) við 0 en eftir nokkurra mínútna göngu inn eftir hellisgólfinu var styrkurinn kominn yfir 20 ppm. Síðan fór hann hækkandi og á 2 mínútna tímabili mældust mjög há gildi, á bilinu 120-183 ppm. Við slíkan styrk brennisteinsvetnis er bráðahættuástand, lyktarskyn hverfur og erting öndunarfæra vex Lögreglan á Suðurlandi hvetur fólk í ferðaþjónustu, sem og einstaklinga í hálendisferðum, til þess að kynna sér þessa hættu en ljóst er að þurfi að bjarga fólki við þessar aðstæður mun þurfa á sérhæfðum búnaði að halda fyrir þá sem vinna að björgun. Á vef almannavarna er að finna upplýsingar um hætur sem fylgja mengun af brennisteinsvetni. (hér) Þar segir m.a.: Brennisteinsvetni, (H2S) 8 klst mengunarmörk eru 5 ppm (7mg/m3). 15 mínútna mengunarmörk eru 10 ppm (14mg/m3) Eitrunareinkenni eru m.a: Við 20-50 ppm má reikna með ógleði og lyktarskyn slævist. Við 100-200 ppm er bráðahættuástand þá hverfur lyktarskyn og erting öndunarfæra vex. Við 250-500 ppm verða menn sljóir. Meðvitundarmissir verður við 500 ppm. Við 1000 ppm verður öndunarlömun (banvænt).

Helstu verkefni á Suðurlandi vikuna 4 til 10 september 2017

37 ökumenn voru kærðir fyrir að aka of hratt í liðinni viku. Tveir þeirra reyndust á yfir 140 km/klst hraða, báðir í uppsveitum Árnessýslu, annar á 141 en hinn á 143 km/klst hraða. 5 voru á hraðabilinu frá 130 til 139 km/klst. 5 ökumenn eru grunaðir um að hafa ekið undir áhrifum áfengis á þessu tímabili. Kona slasaðist þegar hún féll af hesti við Svínafell í Öræfum. Hún var flutt með sjúkrabifreið til Hafnar í Hornafirði en er ekki talin alvarlega slösuð. Þá brotnaði kona á fæti þegar hún féll á göngustíg við Kerið í Grímsnesi. Önnur kona er talin brotin á hönd eftir að hafa dottið á bílastæði við Skógarfoss. Allir þessir aðilar eru erlendir ferðamenn á ferð sinni um landið. Karlmaður slasaðist þegar jarðvegur gaf sig undan kornvalsi þar sem verið var að valsa korn á byggakri í Árnessýslu. Valsinn féll að dráttarvél sem ætlað var að knýja hann en maðurinn varð þar á milli og hlaut áveka á brjóstkassa við það. Hann var fluttur með þyrlu LHG á sjúkrahús í Reykjavík. Þá slasaðist maður þegar hann ók bifreið sinni á mikilli ferð á vegrið við Ölfusárbrú og á brúnni sjálfri. Hann kastaði sér síðan í ána en var bjargað á land af björgunarsveitarmönnum skömmu síðar. Hann er enn á gjörgæslu Landspítala Háskólasjúkrahúss. Ökumaður pallbíls var stöðvaður við akstur á Suðurlandsvegi við Djúpadal að kvöldi 8. september s.l. með 3 hesta á kerru sem hann dró með bifreiðinni. Kerran var ljóslaus með öllu og við athugun kom í ljós að hún hafði síðast verið færð til skoðunar á árinu 2008. Ökumanni var fylgt með lestina á Hvolsvöll þar sem skráningarnúmer voru tekin af kerrunni og hún þar með kyrrsett.

Göngur og réttir í og við umdæmi lögreglunnar á Suðurlandi 2017 – umferðartafir

Framundan eru haustsmalanir með tilheyrandi umferð gangandi, ríðandi og akandi smala að ógleymdu sauðfénu sem þeir reka á undan sér. Fyrir liggur að föstudaginn 8. september og laugardaginn 9. september má búast við umferðartöfum á eftirtöldum vegum í Biskupstungum vegna fjárrekstra. Föstudaginn 8 .september 2017: Biskupstungnabraut F35 , milli Gullfoss og Geysis frá kl. 11:30 til 13:30. Skeiða- og Hrunamannavegur F30 við Gýgjarhól milli kl. 14:00 og 15:30. Einholtsvegur F358 frá Kjarnholtum að Tungnaréttum frá kl. 16:00 fram á kvöld. Laugardaginn 9. september 2017: Biskupstungnabraut F35 frá Vatnsleysu að Múla frá kl. 13:00 og fram eftir degi. Einholtsvegur F358 frá Tungnaréttum að Gýgjarhólskoti frá kl. 13:00 og fram eftir degi. Vegfarendur eru hvattir til þess að sýna aðgát og þolinmæði í kring um fjárrekstra og um leið eru ferðaskipuleggjendur minntir á að gera ráð fyrir töfunum í sinni dagskrá. Skv. lista á bbl.is verður réttað á eftirtöldum stöðum og dögum í og við umdæmi lögreglunnar á Suðurlandi:

Suðausturland

Borgarhafnarrétt, Suðursveit, A-Skaft. laugardaginn 9. sept. um kl. 15.00

Fossrétt á Síðu, V.-Skaft. laugardaginn 9. sept.

Grafarrétt í Skaftártungu, V.-Skaft. laugardaginn 9. sept.

Lögrétt Álftveringa í landi Holts og Herjólfsstaða Upplýsingar liggja ekki fyrir.

Skaftárrétt, V.-Skaft. laugardaginn 9. sept.

Suðurland

Austur-Landeyjaréttir hjá Grenstanga, Rang. sunnudaginn 24. sept.

Brúsastaðarétt í Þingvallasveit, Árn. sunnudaginn 17. sept. kl. 17.00

Fjallrétt við Þórólfsfell, Rang. mánudaginn 11. sept. kl. 10.00

Fljótshlíðarrétt í Fljótshlíð, Rang. sunnudagurinn 17. sept. kl. 11.00

Fossvallarétt við Lækjarbotna sunnudaginn 17. sept. kl. 11.00

Haldréttir í Holtamannaafrétti, Rang. sunnudaginn 10. sept. Kl. 10.00

Heiðarbæjarrétt í Þingvallasveit, Árn. laugardaginn 16. sept. kl. 15.00

Hraðastaðarétt í Mosfellsdal sunnudaginn 17. sept. kl. 13.00, seinni réttir sun. 1. okt. kl. 13.00

Hrunaréttir í Hrunamannahr., Árn. föstudaginn 15. sept. kl. 10.00

Húsmúlarétt við Kolviðarhól, Árn. laugardaginn 16. sept. Kl. 14.00, seinni réttir lau. 30. sept. kl. 14.00

Kjósarrétt í Kjós sunnudaginn 17. sept. kl. 15.00. Seinni réttir sun. 8. okt. kl. 15.00

Krýsuvíkurrétt v. Suðurstrandarveg, Gullbr. laugardaginn 23. sept. kl. 13.00

Landréttir við Áfangagil, Rang. fimmtudaginn 21. sept. kl. 12.00

Laugarvatnsrétt, Árn. sunnudaginn 10. sept. kl. 16.30

Reyðarvatnsréttir á Rangárvöllum laugardaginn 16. sept. kl. 11.00

Reykjaréttir á Skeiðum, Árn. laugardaginn 16. sept. kl. 9.00

Selflatarétt í Grafningi mánudaginn 18. sept. kl. 9.45

Seljalandsréttir undir Eyjafjöllum Rang. laugardaginn 16. sept.

Selvogsrétt í Selvogi, Árn. sunnudaginn 17. sept. Kl. 9.00

Skaftholtsréttir í Gnúpverjahreppi, Árn. föstudaginn 15. sept. kl. 11.00

Tungnaréttir í Biskupstungum laugardaginn 9. sept. kl. 9.00

Vestur-Landeyjaréttir við Forsæti, Rang. sunnudaginn 24. sept.

Þóristunguréttir, Holtamannaafr., Rang. sunnudaginn 10. sept. kl 10.00

Þórkötlustaðarétt í Grindavík laugardaginn 16. sept. kl. 14.00

Ölfusrétt í Reykjadal, Ölfusi sunnudaginn 17. sept. Kl. 16.00

Helstu verkefni dagana 21. til 28. ágúst

72 voru kærðir fyrir að aka of hratt í liðinni viku. Flestir eða 25 í vesturhluta umdæmisins en 16 voru kærðir fyrir að aka of hratt á þjóðvegi 1 í Öræfum. Þá voru 12 kærðir fyrir að aka of hratt í nágreni starfstöðvar lögreglu á Hvolsvelli. 3 voru kærðir fyrir að flytja of þungan farm á bifreiðum sínum. 2 með allt að 10% umfram þunga en einn með meira en 30% umfram þunga. Sá var við vegavinnu og kvaðst einungis vera að aka stutta leið úr námu. Höfð voru afskipti af ökumanni pallbifreiðar með kerru í eftirdragi á leið sinni úr byggingarvöruverslun á Selfossi. Á kerru sem bíllinn dró var timburbúnt, svo afturþungt að þegar ýtt var á endann á því lyftist bifreiðin að aftan. Ökumaðurinn „ætlaði skamma vegalengd“ með timbrið en var gert að gera úrbætur áður en lengra var haldið. Það er fremur sjaldgæft að fundið sé að því að það vanti hleðslu á ás bifreiða. 3 voru kærðir vegna gruns um að þeir væru undir áhrifum fíkniefna við akstur bifreiða sinna. Einn þeirra var einnig grunaður um að vera undir áhrifum áfengis. Annar mældist á 133 km/klst hraða á Sandskeiði þar sem leyfður hámarkshraði er 90 km/klst og viðurkenndi sá að hafa neytt kókaíns fyrir aksturinn. 2 aðrir voru kærðir fyrir meinta ölvun við akstur, annar þeirra erlendur ferðamaður sem lauk máli sínu með sektargreiðslu og sviptingu ökuréttar daginn eftir að málið kom upp. Í þrígang var grenslast fyrir um ferðamenn sem farið höfðu af leið. Allir komust heilir til byggða, ýmist með aðstoð lögreglu, björgunarsveita eða landeiganda. Einn var á Fimmvörðuhálsi og hafði komið sér í sjálfheldu þar. Björgunarsveit aðstoðaði hann. Annar fór af leið á Langjökli en kom sér sjálf í húsaskjól og gerði vart við sig og var sóttur af lögreglu. Þriðji var villtur í myrkri á Sólheimasandi og var aðstoðaður í bíl af landeiganda þar. Stúlka slasaðist á hönd þegar hún lenti með hana í ullartætara á bæ í Rangárvallasýslu. Hún var flutt á sjúkrahús til aðhlynningar. Erlendur ferðamaður er talinn mjaðmargrindarbrotinn eftir fall við Fjallsárlón og annar slíkur féll við Jökulsárlón og slasaðist. Þá slösuðust hjón þegar sleði sem þau óku um Sólhemajökul valt. Talð er að bæði hafi handleggsbrotnað við slysið.

Banaslys við Reynisfjöru í Mýrdal

Erlendur ferðamaður lést við Reynisfjöru í Mýrdal þegar hann féll til jarðar með svifvæng sem hann flaug þar um kl. 18:43 í kvöld. Lífgunartilraunir á vettvangi báru ekki árangur og var hann úrskurðaður látinn á staðnum. Rannsókn málsins er í höndum lögreglunnar á Suðurlandi en ekki er unnt að gefa frekari upplýsingar um málið að svo stöddu.

Vegna vinnu í fjöldahjálparstöð í Hveragerði.

Eins og fram hefur komið í fjölmiðlum var opnuð fjöldahjálparstöð í Grunnskólanum í Hveragerði í fyrrakvöld vegna Nóróveirusýkingar sem kom upp á Úlfljótsvatni. 181 einstaklingur var fluttur í fjöldahjálparstöðina. Var um að ræða skátahópa frá Bretlandseyjum og Bandaríkjunum auk starfsfólks á Úlfljótsvatni. Stöðufundur fulltrúa viðbragðsaðila var haldinn kl. 10:00 í morgun í Hveragerði. Fram kom að dregið hefur verulega úr tíðni nýrra sýkinga og einungis 3 skjólstæðingar hafa veikst síðan í gærkvöldi. Flestir eru á góðum batavegi og einungis 8 einstaklingar hafa verið með meltingareinkenni síðustu 8 klst. og þar af eru 4 einstaklingar sem eru enn með einkenni af þeim 71 alls sem hafa veikst. Enn eru 66 einstaklingar í fjöldahjálparstöðinni og verið er að vinna að því að finna þeim góða aðstöðu til að dvelja í næstu daga. Nokkrir eru þegar farnir til síns heima erlendis samkvæmt sinni ferðaáætlun, en síðustu hóparnir eiga samkvæmt plani að halda af landi brott á miðvikudag. Fjöldahjálparmiðstöð verður áfram opin eins lengi og þurfa þykir og er fyrirhugað að sú starfsemi verði í hluta húsnæðis Grunnskólans í Hveragerði fram á mánudag ef þarf. Þegar er byrjað að sótthreinsa hluta skólans með það í huga að starfsemi geti hafist þar á þriðjudag. Fyrirhugaður er stuttur stöðufundur viðbragðsaðila kl. 17 í dag.

112 Neyðarnúmer

Þarft þú aðstoð lögreglu – hringdu þá í 112

Símanúmer

444 2000. Lögreglan minnir einnig á fíkniefnasímann 800-5005.

Hafðu samband

með því að senda tölvupóst á netfangið sudurland@logreglan.is. eða smella hér og fylla út formið

Lögreglustjórinn á Suðurlandi

Hlíðarvegur 16,
860 Hvolsvöllur

Skrifstofa lögreglustjóra er opin mánudaga til fimmtudaga frá kl. 9:00 til 15:00 en á föstudögum frá kl. 9:00 til 13:00

Sími: 444 2000
Netfang: sudurland@logreglan.is
Fax: 444 2009

Lögreglustjóri umdæmisins:

Kjartan Þorkelsson

Lögregluvarðstofa Kirkjubæjarklaustri

Lögregluvarðstofa Kirkjubæjarklaustri

Iðjuvellir 7
880 Kirkjubæjarklaustur
Þjónustusími: 444 2010
Netfang: sudurland@logreglan.is