12 Júní 2012 12:00
Lögreglan á Suðurnesjum stöðvaði fyrir og um helgina þrjá ökumenn sem allir voru réttindalausir undir stýri. Einn þeirra, karlmaður á þrítugsaldri var stöðvaður á Reykjanesbraut, þar sem hann ók á 139 kílómetra hraða, en þar er hámarkshraði 90 kílómetrar á klukkustund. Maðurinn hafði aldrei öðlast ökuréttindi. Annar réttindalaus ökumaður stöðvaði bíl sinn, þegar hann varð lögreglu var og tók á rás í burtu. Síðan kvaðst hann hafa misst stjórn á sér og bað lögreglu afsökunar á atferli sínu. Þriðji ökumaðurinn sem lögregla hafði afskipti af hafði áður verið sviptur ökuréttindum.
Tvö ung börn laus í bíl
Lögreglan á Suðurnesjum stöðvaði för bifreiðar í Sandgerði, þar sem barn var laust í aftursæti hennar. Þegar lögreglumaður fór að ræða við ökumanninn, konu á sextugsaldri, sá hann að annað lítið barn var laust í framsæti bílsins. Var það ekki í bílstól og svo lítið að það náði ekki upp fyrir mælaborð bifreiðarinnar. Vettvangsskýrsla var gerð um atvikið. Lögregla hvetur foreldra og forráðamenn barna til þess að tryggja öryggi þeirra í bifreið með lögboðnum hætti áður en lagt er af stað.