16 Október 2008 12:00
Lögreglan á Vestfjörðum lagði hald á tæplega 250 grömm af hassi, 44 ecstasytöflur og tæpt gramm af amfetamíni aðfaranótt miðvikudagsins 15. þessa mánaðar. Hluti efnisins fannst við leit lögreglu í bifreið sem tveir ungir menn komu akandi á úr Reykjavík, þá nokkrum klukkustundum áður. Hinn hluti efnisins fannst falinn á afviknum stað, utan dyra á Ísafirði.
Fíkniefnaleitarhundurinn Dollar tók þátt í leitinni.
Mennirnir voru í haldi lögreglunnar meðan rannsókn málsins stóð yfir og var sleppt að yfirheyrslum loknum síðdegis í gær. Þeir hafa báðir komið við sögu vegna fíkniefnamála áður.
Mennirnir hafa viðurkennt að hafa ætlað að bjóða efnið til sölu á norðanverðum Vestfjörðum.
Annar aðilanna er jafnframt grunaður um að hafa ekið bifreiðinni undir áhrifum fíkniefna.