29 September 2015 17:32
Það var í ýmis horn að líta hjá lögreglu í liðinni viku vegna hinna ýmsu verkefna sem upp komu. Þrátt fyrir fjölda fólks að skemmta sér um helgina fór skemmtanahaldið ágætlega fram og lítið um útköll á öldurhúsin.
Að morgni sl. sunnudags var lögreglan kölluð að Ásavegi 18 vegna elds í timburkofa í garði sunnan við húsið. Jafnframt var slökkvilið Vestmannaeyja kallað út. Þegar komið var á staðinn var mikill eldur í kofanum, en greiðlega gekk að slökkva eldinn og varð ekki teljandi tjón á íbúðarhúsinu. Á vettvangi var maður í annarlegu ástandi sem grunaður er um að hafa kveikt í kofanun. Jafnframt braut hann rúðu í kjallarahurð og fór þar inn. Maðurinn var handtekinn og fékk gistingu í fangageymslu þar til víman rann af honum. Hann neitaði sök og er málið í rannsókn.
Einn ökumaður var stöðvaður í liðinni viku vegna gruns um ölvun við akstur, en hann hefur ítrekað verið staðin að akstri undir áhrifum áfengis og var hann jafnframt réttindalaus við aksturinn.
Þá liggur ein sekt fyrir vegna brota á umferðarlögum en þarna var um svokallað stöðubrot að ræða, eða ólöglega lagningu ökutækis.
Eitt umferðaróhapp var tilkynnt lögreglu í vikunni en um var að ræða minniháttar óhapp og engin slys á fólki.