Helstu verkefni á Austurlandi frá 2. apríl til 18. apríl.

19 Apríl 2018 13:02
Síðast uppfært: 19 Apríl 2018 klukkan 13:04

Alls sinnti lögreglan 244 verkefnum á tímabilinu. Flest þeirra voru tengd umferðinni og þar má nefna að lögregla hafði afskipti af 37 ökumönnum vegna umferðarlagabrota og þar af voru 30 ökumenn stöðvaðir fyrir hraðakstur. Lögregla sinni 6 umferðaróhöppum en ekki voru slys á ökumönnum eða farþegum í þeim.

Þann 2. apríl lentu fjórar þotur Icelandair á Egilsstaðaflugvelli og sinnti lögreglan gæslu við flugvöllinn vegna þess.

Nokkuð var um að lögregla þyrfti að hafa afskipti af fólki vegna heimilisónæðis og ölvunar.

Þann 14. apríl var haldin hópslysaæfing í Norðfirði og tókst hún með ágætum, nokkuð reyndi þó á viðbragðsaðila vegna fjölda slasaðra sem fluttir voru á sjúkrahúsið í Neskaupstað. Að æfingunni komu allflestir viðbragðsaðilar á frá öllu Austurlandi. Mikið ringdi á meðan æfingunni stóð sem gerði viðbragðsaðilum ekki auðveldara fyrir á vettvangi.

Að lokum er þarft að minna ökumenn á að núna 1. maí næstkomandi munu sektir vegna umferðarlagabrota hækka mikið. Nefna má t.d. að sekt fyrir að tala í farsíma án handfrjálsbúnaðar hækkar úr 5000 kr í 40.000 kr.

Lögreglan á Austurlandi vill óska austfirðingum sem öllum  landsmönnum gleðilegs sumars.