24 Nóvember 2015 10:53
Lögreglan á Norðurlandi eystra framkvæmdi í gærdag húsleit í húsnæði á Akureyri eftir að kæra hafði verið lögð fram þess efnis að þar væri búin til lyfjablanda til lækninga án þess að tilskilin leyfi væru til staðar. Hald var lagt á nokkra tugi lítra af Natriumchlorit, minniháttar magn af sítrónusýru og lyfjaglös undir vökva.
Þá var einnig framkvæmd húsleit á sveitabæ í umdæmi lögreglunnar þar sem hald var lagt á 58 kannabisplöntur og um 100 grömm af kannabisefnum. Einnig var lagt hald á búnað til ræktunarinnar. Þrír menn voru handteknir í tengslum við málið og sleppt að loknum yfirheyrslum. Bæði málin eru til rannsóknar hjá lögreglu.