8 Október 2021 19:31
Lítilsháttar hreyfing mældist í dag í hlíðinni á Seyðisfirði milli skriðusársins frá desember 2020 og Búðarár. Hreyfingin er mismikil eftir því hvar mælar Veðurstofu eru staðsettir. Svæðið sem um ræðir er talsvert sprungið og því talið líklegra að það muni falla í smærri brotum fremur en að það fari allt í einu.
Unnið er að mati á því hvort leiðigarðar og safnþró taki við því efni sem óstöðugt er í hlíðinni, jafnvel þó það fari allt í einu. Niðurstaða þess og frekara mat á aðstæðum ætti að liggja fyrir strax eftir helgi.
Engar aðrar hreyfingar hafa mælst í hlíðum ofan Seyðisfjarðar.
Þetta er meðal þess sem kom fram á fundi Veðurstofu og almannavarna með íbúum Seyðisfjarðar í dag í Herðubreið.
Herðubreið verður opin á morgun frá klukkan 14 til 16 líkt og verið hefur. Öll velkomin.
Ekki er gert ráð fyrir að íbúar geti snúið til síns heima fyrr en eftir helgi. Öll óviðkomandi umferð um skriðusvæðið er óheimil.
Minnt er á hjálparsíma Rauða krossins í síma 1717.
- Á bloggsíðu Veðurstofu Íslands er hægt að skoða staðsetningu svæðisins er um ræðir og hreyfingar á speglum, auk þess sem þar má fá ítarlegri upplýsingar um stöðu mála.
- Einnig er á Veðurstofu Íslands tilkynningarborði þar sem hægt er að nálgast upplýsingar um vöktun og fleira.