9 Febrúar 2016 14:20
Ökumaður, sem var á leiðinni í gegnum umdæmið, var sl. föstudag, tekinn grunaður um akstur undir áhrifum kókaíns, annar ökumaður var tekinn á Akranesi grunaður um að aka undir áhrifum kannabis. Þá var atvinnubílstjóri tekinn í Borgarnesi, grunaður um ölvunarakstur.
Alls urðu 7 umferðaróhöpp í umdæmi LVL í sl viku.
Ökumaðurinn sem var að taka framúr traktor í Reykholtsdal, missti í framhaldinu stjórn á jeppabifreið sinni sem snerist í hálkunni, valt og hafnaði ofaní vegskurði.
Allir í bílnum, tvö ungabörn auk ökumanns, voru í öryggisbeltum og sluppu án teljandi meiðsla. Var fólkið til öryggis flutt á heilsugæslustöðina í Borgarnesi til skoðunar.
Bifreiðin var óökufær og var fjarlægð af kranabíl.
Fullorðinn ökumaður missti stjórn á jeppanum sínum á Vesturlandsvegi skammt norðan við Fiskilæk sl. föstudag. Fór jeppinn útaf veginum en hélst á hjólunum og fór síðan upp á veginn og þá í veg fyrir fólksbíl sem kom úr gagnstæðri átt. Öryggisbelti og líknarbelgir björguðu fólkinu frá því að slasast mikið í þessum harða árekstri. Voru ökumenn og farþegar fluttir á sjúkrahúsið á Akranesi til skoðunar en talið var að um minniháttar meiðsl væri að ræða. Bílarnir voru báðir mikið skemmdir og óökufærir og voru þeir fluttir á brott með kranabíl.
Þriggja bíla árekstur varð á Snæfellsnesvegi við Flesjustaði en sá fjórði, sem segja má að hafi verið orsakavaldurinn, slapp. Tildrögin óhappsins voru þau að bíll erlendra ferðamanna bilaði og var honum lagt út í vegkantinn skammt frá blindhæð. Ökumaður bíls sem kom þar á eftir rétt náði að stöðva en þá lenti bíll sem var á eftir honum á þeim kyrrstæða og kastaðist hann síðan í veg fyrir bíl sem kom úr gagnstæðri átt. Allir bílarnir voru í ökufæru ástandi og ökumenn og farþegar sluppu án teljandi meiðsla að því talið var. En fólkinu var samt ráðlagt að fara í læknisskoðun.
Fimm, franskir og sænskir, ferðamenn veltu jeppanum sínum á Snæfellsnesvegi skammt frá Vegamótum sl. sunnudag. Fólkið var í öryggisbeltum og slapp með skrekkinn en bíllinn reyndist óökufær og var fjarlægður af kranabíl. Mikil hálka var á vettvangi.
Lögreglan fékk einkaaðila til að aðstoða erlenda ferðamenn sem höfðu fest bílana sína í snjó víðs vegar um umdæmið í sl. viku, svipaðan fjölda og undanfarnar vikur.