18 Apríl 2012 12:00
Lögreglunni á Selfossi barst kl. 18:55 í kvöld tilkynning um að rútubifreið með 68 skólabörnum af höfuðborgarsvæðinu hefði farið út af Nesjavallavegi í Grafningi. Þegar voru sendar tiltækar sjúkrabifreiðar á vettvang ásamt því að hópslysaviðbúnaður var virkjaður. Fljótlega kom í ljós að meiðsl voru minniháttar og einungis einn var fluttur með sjúkrabifreið af vettvangi. Hann kvartaði undan eymslum í baki. Fengnar voru aðrar rútur til að flytja skólakrakkana í áður fyrirhugaðan náttstað. Þau bera sig vel, ætla að halda hópinn, en fulltrúar Rauða krossins munu ræða við þau þegar þangað kemur.
Rannsóknardeild lögreglunnar á Selfossi er á vettvangi ásamt bíltæknifræðingi vegna rannsóknar málsins.