2 Ágúst 2013 12:00

Í gær (1. ágúst) voru 7 ökumenn á leið til Ísafjarðar kærðir fyrir of hraðan akstur.  Flestir þeirra voru í Ísafjarðardjúpi.  Sá sem hraðast ók var mældur á 128 km. hraða.  Sá má búast við sekt sem hljóðar upp á 70.000.- kr.

Þá var einn farþegi sem kom með áætlunarvél til Ísafjarðar tekinn með 2 gr. af kannabisefnum.  Fíkniefnahundurinn Clarrissa aðstoðaði lögreglumenn í því tilviki.

Einn aðili var vistaður í fangageymslu á Ísafirði í nótt sökum ölvunar og óláta.

Einn ökumaður var kærður fyrir að aka um á negldum hjólbörðum og þrír ökumenn voru kærðir fyrir að virða ekki stöðvunarskyldu á Ísafirði.

Lögreglan býst við töluverðri umferð til Ísafjarðar í tengslum við Mýrarboltamót sem þar verður haldið um verslunarmannahelgina.  Ökumenn eru hvattir til að stilla hraða í hóf og vera vel upplagðir við aksturinn.  Lögreglan mun auka umferðareftirlit alla helgina og ekki aðeins á Ísafirði og nágrenni heldur Vestfjörðum öllum.  Þá hefur lögreglunni á Vestfjörðum borist liðsauki bæði í formi lögreglumanna úr öðrum lögregluliðum og eins með fíkniefnaleitarhundi sem verður lögreglumönnum á Vestfjörðum til aðstoðar.  Rétt er að minna á að lögreglan á Vestfjörðum hefur ekkert umburðarlyndi gagnvart fíkniefnum.

Veður er með besta móti á Vestfjörðum.