14 Nóvember 2006 12:00
Tíu umferðaróhöpp voru tilkynnt til lögreglunnar í Reykjavík í gær en það þykir í minna lagi. Ekki er vitað um nein slys á fólki í þessum óhöppum og því má með sanni segja að umferðin hafi gengið vel fyrir sig. Þá bar sama og ekkert á hraðakstri og svo virðist sem ökumenn hafi almennt tekið tillit til aðstæðna.
Örfáir spenntu ekki beltin eða töluðu í síma án þess að nota handfrjálsan búnað og einn ökumaður var stöðvaður fyrir að aka gegn rauðu ljósi. Þá var tæplega fertugur karlmaður tekinn í umferðinni í austurbænum í gærmorgun en sá reyndist þegar hafa verið sviptur ökuleyfi. Í gær klippti lögreglan skrásetningarnúmer af fjórum ökutækjum sem höfðu ekki verið færð til skoðunar.