21 September 2019 09:30
Bygging lögreglustöðvarinnar við Hverfisgötu í Reykjavík hófst í árslok 1961, en húsið teiknaði hinn landskunni arkitekt og íþróttafrömuður, Gísli Halldórsson. Lögreglustöðin var tekin í notkun í áföngum eftir því sem byggingarframkvæmdum miðaði áfram. Hornsteinn var lagður 1963 og 1966 flutti umferðardeildin úr bragga við Snorrabraut og í kjallara hússins og Lögregluskólinn fékk líka inni í nýju lögreglustöðinni um svipað leyti, en á fyrstu hæðinni. Í ársbyrjun 1970 fjölgaði enn í húsinu, en þá var tekin þar í notkun fullkomin fangageymsla á 2. hæð. Það var svo 4. nóvember 1972 sem lögreglan flutti alfarið með starfsemi sína úr gömlu lögreglustöðinni í Pósthússtrætinu og í nýju stöðina á Hverfisgötu. Samhliða var reyndar lengi starfrækt lítil lögreglustöð í Tryggvagötu, en sú saga verður ekki rakin hér.
![](https://www.logreglan.is/wp-content/uploads/2019/09/1-1.jpg)
Menn voru stórhuga þegar bygging lögreglustöðvarinnar á Hverfisgötu var annars vegar, en tvær bygginganna á þessu líkani urðu ekki að veruleika, þ.e. austanmegin og á norðanverðri lóðinni. Þá var ennfremur fallið frá því að byggja 6. hæðina og þakhýsi þar ofan á.
![](https://www.logreglan.is/wp-content/uploads/2019/09/2.jpg)
Á þessari loftmynd af Hverfisgötu 113-115 má sjá bæði bensínstöð og hús vörubílastöðvarinnar Þróttar á lóðinni. Margt hefur því breyst frá þessum tíma og það á líka við um næsta nágrenni lögreglustöðvarinnar eins og sést hér glögglega.
![](https://www.logreglan.is/wp-content/uploads/2019/09/3-1.jpg)
Margt fyrirmenna var samankomið þegar hornsteinn var lagður að lögreglustöðinni 1. júní 1963, en við látum lesendum eftir að þekkja þessa þjóðkunnu menn á myndinni.