19 Febrúar 2007 12:00
Tuttugu og fjórir ökumenn voru teknir fyrir ölvunarakstur á höfuðborgarsvæðinu um helgina. Fjórtán voru stöðvaðir í Reykjavík, sex í Kópavogi og fjórir í Hafnarfirði. Flestir voru teknir aðfaranótt sunnudags, eða níu. Þetta voru tuttugu karlmenn og fjórar konur. Elsta konan er á sextugsaldri en sú yngsta 18 ára, hinar eru báðar á þrítugsaldri. Meirihlutanna karlanna er á þrítugsaldri.
Sá yngsti í karlahópnum er hins vegar 17 ára. Sá fékk bílpróf fyrir fáeinum mánuðum en hann var tekinn í Árbænum aðfaranótt laugardags. Með honum í bílnum voru þrjú önnur ungmenni sem eru 15 og 16 ára. Pilturinn var færður á lögreglustöð og þar var hringt í mömmu hans. Hún var lögreglunni mjög þakklát og sagði að nú væri nóg komið. Hér eftir fengi sonurinn ekki að snerta bílinn.