20 Desember 2019 15:40
Skráð voru 732 hegningarlagabrot á höfuðborgarsvæðinu í nóvember og fækkaði þessum brotum töluvert á milli mánaða. Þetta kemur fram í mánaðarskýrslu lögreglustjórans á höfuðborgarsvæðinu fyrir nóvember 2019.
Tilkynningar um þjófnaði fækkaði á milli mánaða og var þar helst að sjá fækkun á hnupli og innbrotum. Skráðum innbrotum fækkaði til að mynda úr 137 í október niður í 94 í nóvember.
Skráðum ofbeldisbrotum fjölgaði töluvert á milli mánaða og á fjölgunin við um bæði minniháttar og meiriháttar líkamsárásir. Það sem af er ári hafa borist um fjögur prósent færri tilkynningar um ofbeldisbrot en bárust að meðaltali á sama tímabili sl. þrjú ár á undan.
Alls bárust 23 beiðnir um leit að börnum og ungmennum í nóvember og fjölgar þeim beiðnum um rúm 76% frá því í október. Ekki hafa borist jafn margar leitarbeiðnir síðan í október 2018.
Skráðum fíkniefnabrotum fækkaði töluvert á milli mánaða. Tilkynningum þar sem ökumaður var grunaður um akstur undir áhrifum ávana- og fíkniefna fækkaði einnig á milli mánaða og tilkynningum þar sem ökumaður var grunaður um ölvun við akstur.
Í október voru skráð 1.017 umferðarlagabrot (að hraðamyndavélum undanskildum). Það sem af er ári hafa verið skráð um 9% fleiri umferðarlagabrot á höfuðborgarsvæðinu en að meðaltali á sama tíma síðustu þrjú ár á undan. Vert er að taka fram að skráð umferðarlagabrot voru innan útreiknaðra marka fyrir síðustu sex og síðustu 12 mánuði á undan.