18 Ágúst 2022 10:22
Skráð voru 765 hegningarlagabrot á höfuðborgarsvæðinu í júlí og fækkaði þessum brotum lítillega á milli mánaða. Þetta kemur fram í mánaðarskýrslu lögreglustjórans á höfuðborgarsvæðinu fyrir júlí 2022.
Tilkynningum um þjófnað fækkaði lítillega á milli mánaða. Heilt yfir bárust þó álíka margar tilkynningar og hafa borist að meðaltali síðustu 12 mánuði á undan. Af þjófnaðarbrotum fækkaði innbrotum mest á milli mánaða. Alls bárust 82 tilkynningar um innbrot í júlí miðað við 105 tilkynningar í júní. Það sem af er ári hafa þó borist álíka margar tilkynningar um innbrot líkt og bárust að meðaltali fyrir sama tímabil síðustu þriggja ára á undan.
Alls barst 121 tilkynning um ofbeldisbrot í júlí og fækkaði þessum tilkynningum á milli mánaða. Tilkynningum um heimilisofbeldi fækkaði einnig á milli mánaða. Í júlí var tilkynnt um 19 kynferðisbrot, er það þónokkur fækkun tilkynninga miðað við síðustu mánuði á undan. Það sem af er ári hafa verið skráð um 13 prósent færri kynferðisbrot á höfuðborgarsvæðinu samanborið við meðaltal á sama tímabili síðustu þrjú ár á undan.
Alls bárust 15 beiðnir um leit að börnum og ungmennum í júlí sem er fjölgun á milli mánaða. Heilt yfir hafa þó borist um 34% færri beiðnir það sem af er ári miðað við síðustu þrjú ár á undan.
Þónokkur fjölgun var á tilkynningum um nytjastuld ökutækja í júlí. Alls bárust 32 tilkynningar sem eru um 44 prósent fleiri tilkynningar en að meðaltali síðustu sex mánuði á undan. Það sem af er ári hafa þó borist færri tilkynningar um nytjastuld en árin á undan.
Skráðum fíkniefnabrotum fækkaði á milli mánaða og var eitt stórfellt fíkniefnabrot skráð í júlí. Tilkynningum þar sem ökumaður var grunaður um akstur undir áhrifum ávana- og fíkniefna fækkaði á milli mánaða en tilkynningum þar sem ökumaður var grunaður um ölvun við akstur fjölgaði.