26 September 2023 12:57
Alls bárust 816 tilkynningar um hegningarlagabrot á höfuðborgarsvæðinu í ágúst. Um helmingur brotanna voru með skráðan vettvang á svæði lögreglustöðvar 1, sem nær yfir Miðborg, Vesturbæ, Seltjarnarnes, Háaleiti, Hlíðar og Laugardal. Þetta kemur fram í mánaðarskýrslu lögreglustjórans á höfuðborgarsvæðinu fyrir ágúst 2023.
Tilkynningum um þjófnaði fækkaði töluvert á milli mánaða sem og tilkynningum um innbrot. Flestar tilkynningar um innbrot í ágúst voru innbrot á heimili.
Alls bárust 125 tilkynningar um ofbeldisbrot í ágúst. Tilkynningar um heimilisofbeldi fækkaði lítillega á milli mánaða og fóru úr 59 tilkynningum í júlí í 57 tilkynningar í ágúst. Það sem af er ári hafa borist um tíu prósent færri tilkynningar um heimilisofbeldi samanborið við meðalfjölda sama tímabils síðustu þrjú ár á undan. Í ágúst voru skráð sjö tilvik þar sem lögreglumaður var beittur ofbeldi og fjögur tilvik þar sem lögreglumanni var hótað ofbeldi.
Alls bárust lögreglunni á höfuðborgarsvæðinu 20 tilkynningar um kynferðisbrot í ágúst, um 16 þeirra tilkynninga voru vegna brota sem áttu sér stað í ágúst. Tilkynningar um kynferðisbrot fækkaði miðað við útreiknuð neðri mörk fyrir síðustu sex og síðustu 12 mánuði á undan.
Alls bárust 10 beiðnir um leit að börnum og ungmennum í ágúst.
Skráðum fíkniefnabrotum fækkaði á milli mánaða og voru skráð tvö stórfelld fíkniefnabrot í ágúst. Heilt yfir hafa þó verið skráð um 28 prósent færri fíkniefnabrot á höfuðborgarsvæðinu en voru skráð að meðaltali á sama tímabili síðustu þrjú ár á undan. Tilkynningum þar sem ökumaður var grunaður um akstur undir áhrifum ávana-og fíkniefna fækkaði á milli mánaða sem og tilkynningum þar sem ökumaður var grunaður um ölvun við akstur.
Í júlí var skráð 671 umferðarlagabrot (að hraðamyndavélum undanskildum) á höfuðborgarsvæðinu. Það sem af er ári hafa verið skráð um sex prósent færri umferðarlagabrot á höfuðborgarsvæðinu en hafa verið skráð að meðaltali á sama tíma síðustu þrjú ár á undan.