30 Ágúst 2023 14:50
Veðurstofa Íslands hefur sett á gula viðvörun vegna hvassviðris og töluverðrar rigningar að kvöldi föstudags og fram á laugardag. Vegna þessa er skynsamlegt að fólk hugi að því í tíma að festa niður lausamuni svosem trampolín og annað sem er þekkt fyrir að fara af stað í fyrstu veðrum haustsins. Byggingaverktakar eru hvattir til að tryggja byggingarefni og annað á byggingasvæðum svo ekki sé hætta á tjóni á þeim eða af völdum þess. Á þessum sama tíma verður varasamt að vera á ferð á Suðurlandi með hjólhýsi og á húsbílum sem taka á sig mikinn vind gangi spár eftir. Einnig má búast við vatnavöxtum í ám og lækjum eftir því sem úrkoman skilar sér.
Við hvetjum fólk til að fylgjast með veðurspám á vedur.is og/eða blika.is