23 Desember 2013 12:00
Lögreglan á höfuðborgarsvæðinu hefur birt skýrslu með niðurstöðum úr árlegri könnun á viðhorfum til lögreglu, ótta við afbrot og reynslu af þeim. Gagnaöflun var framkvæmd af Félagsvísindastofnun Háskóla Íslands í maí og júní 2013. Tekið var 2.000 manna tilviljunarúrtak úr netpanel Félagsvísindastofnunar og var svarhlutfallið 64%.
Helstu niðurstöður eru:
· Yfirgnæfandi meirihluti (90%) sagði lögreglu skila góðu starfi við að stemma stigu við afbrotum, hlutfallið hefur lítið breyst milli kannanna.
· Flestir sjá lögreglu í sínu hverfi mánaðarlega eða sjaldnar (36%).
· Um 44% svarenda sögðust hafa haft samband við lögreglu með einhverjum hætti. Þar af nýttu flestir sér samfélagsmiðla lögreglu eða 47%.
· Tæp 76% svarenda sögðu lögregluna vera mjög eða frekar aðgengilega. Þetta hlutfall hækkar nú milli ára eftir að hafa lækkað síðustu ár.
· Af þeim sem fannst lögreglan vera óaðgengileg nefndu 44% ástæðu þess vera þá að engin lögreglustöð væri í hverfinu eða byggðarlaginu.
· Rúmlega 85% þátttakanda sögðust mjög ánægðir með þá þjónustu sem þeir fengu í samskiptum við lögreglu, samanborið við 67% árið á undan.
· Um 59% svarenda töldu sig vera óörugga eina á gangi í miðborg Reykjavíkur eftir að myrkur er skollið á eða eftir miðnætti um helgar.
· Yfirgnæfandi meirihluti (88%) taldi sig vera öruggan í sínu hverfi einan á gangi að næturlagi. Hlutfallið hefur haldist svipað í heildina síðustu ár.
· Hlutfallslega flestir töldu eignaskemmdir (21%) og umferðarlagabrot (20%) vera mesta vandamálið í sínu hverfi. Færri nefna innbrot en áður.
· Áfram fjölgar þeim sem segjast hafa upplifað aðstæður þannig síðasta árið að þeir töldu líklegt að þeir yrðu fyrir afbroti. Hlutfallið var 62% í þessari könnun og hefur hækkað með hverri könnun frá 2007.
· Sem fyrr óttuðust flestir að verða fyrir innbroti eða 41%.
· Meirihluti svarenda sagði áhyggjur sínar af afbrotum vera litlar og segja langflestir þær hafa lítil eða engin áhrif á líf sitt.
· í könnuninni sögðust 43% svarenda hafa gripið til aðgerða til að verja heimili sitt fyrir afbrotum á árinu 2012 eða fyrr.
· Rúmlega 23% sögðust hafa orðið fyrir eignaskemmdum árið 2012. Ríflega 14% sögðust hafa orðið fyrir þjófnaði, 7% innbroti, 2,7% sögðust hafa orðið fyrir ofbeldisbroti og 1% kynferðisbroti.
· Lægra hlutfall (28%) sagðist hafa tilkynnt brot nú en í fyrri könnunum (41%). Af þeim sem urðu fyrir þjófnaði tilkynntu 34% brotið, 51% innbrotið, 27% ofbeldisbrotið og 21% eignaskemmdirnar.
· Flestir sögðust ekki hafa tilkynnt vegna þess að brotið hafi ekki verið ekki nægilega alvarlegt.
Smellið hér til að lesa könnunina.